Ommaviy oferta (xizmat ko'rsatish shartnomasi)
Oxirgi tahrir: 20.10.2026
Ushbu hujjat «DEVLINE» MCHJ (STIR 312677883), bundan keyin «Ijrochi» deb ataluvchi tomonidan har qanday jismoniy yoki yuridik shaxsga (bundan keyin «Buyurtmachi») bildirilgan ommaviy oferta hisoblanadi.
Oferta predmeti — topkan.uz manzilida joylashgan «TopKan» bulutli dasturiy ta'minotidan (HR CRM) obuna asosida foydalanish huquqini berish.
Buyurtmachi platformada ro'yxatdan o'tishi, hisobga kirishi yoki obuna uchun to'lovni amalga oshirishi — ofertani to'liq va so'zsiz qabul qilish (aksept) hisoblanadi. Aksept paytidan boshlab taraflar o'rtasida shu shartlardagi shartnoma tuzilgan deb qaraladi.
1. Atamalar
- 1.Platforma — topkan.uz domenida ishlaydigan, Ijrochi tomonidan ishlab chiqilgan va xizmat ko'rsatiladigan «TopKan» dasturiy majmuasi.
- 2.Obuna — tanlangan tarif rejasi doirasida Platformadan belgilangan muddat davomida foydalanish huquqi.
- 3.Tarif rejasi — xizmat hajmi (limitlar, funksiyalar) va narxi Platformaning «Tariflar» bo'limida e'lon qilingan shartlar to'plami.
- 4.Hisob (akkaunt) — Buyurtmachining Platformadagi shaxsiy kabineti va unga bog'langan ma'lumotlar.
- 5.Nomzod — Buyurtmachining vakansiyasiga ariza topshirgan jismoniy shaxs. Nomzodlar Platformadan bepul foydalanadi va Ijrochiga hech qanday to'lov qilmaydi.
2. Shartnoma predmeti
- 1.Ijrochi Buyurtmachiga Platformadan tanlangan tarif rejasi doirasida foydalanish huquqini beradi, Buyurtmachi esa xizmatni ushbu oferta shartlariga muvofiq qabul qiladi va to'laydi.
- 2.Xizmat SaaS (Software as a Service) modelida ko'rsatiladi: Platformaning nusxasi Buyurtmachiga topshirilmaydi, dasturga mutlaq huquqlar Ijrochida qoladi.
- 3.Xizmat internet orqali masofadan ko'rsatiladi. Xizmat ko'rsatilgan joy — Ijrochining ro'yxatdan o'tgan manzili.
3. Ro'yxatdan o'tish va hisob
- 1.Ro'yxatdan o'tishda Buyurtmachi to'g'ri va to'liq ma'lumot ko'rsatishi shart. Noto'g'ri ma'lumot oqibatlari Buyurtmachi zimmasida.
- 2.Hisobga kirish ma'lumotlarini (parol, tokenlar) maxfiy saqlash Buyurtmachi javobgarligida. Hisob orqali amalga oshirilgan barcha harakatlar Buyurtmachi tomonidan qilingan deb hisoblanadi.
- 3.Buyurtmachi o'z hisobiga jamoa a'zolarini taklif qilishi mumkin; ularning harakatlari uchun ham Buyurtmachi javob beradi.
- 4.Bir hisobni bir vaqtning o'zida bir nechta mustaqil tashkilot nomidan ishlatish taqiqlanadi.
4. Tariflar, to'lov tartibi va obuna muddati
- 1.Amaldagi tariflar va narxlar Platformaning «Tariflar» bo'limida e'lon qilinadi. Narxlar O'zbekiston Respublikasi so'mida ko'rsatiladi.
- 2.O'zbekiston Respublikasi rezidenti bo'lmagan Buyurtmachilar uchun narx AQSh dollarida belgilanishi mumkin; bunday narx hisob-faktura yoki tijorat taklifida ko'rsatiladi va valyuta to'lovlari to'g'risidagi qonunchilikka muvofiq to'lanadi.
- 3.Bepul tarif mavjud — u bo'yicha to'lov olinmaydi, funksiyalar va limitlar cheklangan bo'ladi.
- 4.Har bir tarifning limitlari (faol vakansiyalar, jamoa a'zolari, oylik AI baholashlar va boshqalar) «Tariflar» bo'limida ko'rsatiladi. Buyurtmachiga ko'proq kerak bo'lsa, uning so'rovi bo'yicha limitlar Ijrochi bilan kelishilgan holda oshiriladi; narxi va shartlari alohida kelishiladi.
- 5.Pullik obuna oldindan to'lov asosida beriladi: to'lov tushgan kundan boshlab tanlangan davr (oy yoki yil) uchun xizmat faollashtiriladi.
- 6.To'lov Platforma orqali bank kartasi bilan onlayn yoki Ijrochining hisob raqamiga bank o'tkazmasi orqali amalga oshiriladi. Yuridik shaxslarga so'rov bo'yicha hisob-faktura va bajarilgan ishlar dalolatnomasi beriladi.
- 7.Obuna avtomatik uzaytirilmaydi: muddat tugagach xizmat bepul tarif limitlariga qaytadi, ma'lumotlar o'chirilmaydi.
- 8.Ijrochi tariflar va narxlarni o'zgartirish huquqini saqlab qoladi. O'zgarish allaqachon to'langan davrga taalluqli emas.
5. To'lovni qaytarish tartibi
- 1.Kafolat: birinchi pullik to'lovdan keyin 7 (yetti) kalendar kun ichida Buyurtmachi xizmatdan qoniqmasa, sababini ko'rsatmasdan to'lovni to'liq qaytarishni talab qilishi mumkin. Kafolat har bir Buyurtmachiga bir marta — faqat birinchi to'lovga qo'llaniladi; keyingi to'lovlar va uzaytirishlarga taalluqli emas.
- 2.Xizmat Ijrochining aybi bilan ko'rsatilmagan bo'lsa (masalan, Platforma uzluksiz 24 soatdan ortiq ishlamasa), Buyurtmachi foydalanilmagan davr uchun to'lovni qaytarishni talab qilishi mumkin.
- 3.Qaytarish uchun ariza info@topkan.uz manziliga yuboriladi: unda tashkilot nomi, to'lov sanasi va summasi, sabab ko'rsatiladi.
- 4.Ariza 3 (uch) ish kuni ichida ko'rib chiqiladi. Asosli deb topilsa, mablag' 10 (o'n) ish kuni ichida to'lov amalga oshirilgan usulda — karta bilan to'langan bo'lsa o'sha kartaga — qaytariladi.
- 5.7 kunlik kafolat holatidan tashqari, foydalanilgan davr uchun to'lov qaytarilmaydi. Obunadan Buyurtmachining o'z xohishi bilan muddatidan oldin voz kechish to'lovni qaytarish uchun asos bo'lmaydi.
- 6.Bepul tarif bo'yicha to'lov olinmagani uchun qaytarish ham qo'llanilmaydi.
6. Taraflarning huquq va majburiyatlari
- 1.Ijrochi Platformaning ishlashini ta'minlaydi, texnik yordam ko'rsatadi va ma'lumotlarning zaxira nusxasini oladi.
- 2.Ijrochi profilaktika ishlari uchun xizmatni vaqtincha to'xtatishi mumkin, imkon qadar oldindan xabar berib.
- 3.Buyurtmachi Platformadan faqat qonuniy maqsadlarda — xodim tanlash jarayonini avtomatlashtirish uchun foydalanadi.
- 4.Buyurtmachiga taqiqlanadi: Platformaga ruxsatsiz kirishga urinish, uni dekompilyatsiya qilish, avtomatlashtirilgan ortiqcha yuklama berish, uchinchi shaxslarga qayta sotish, qonunga zid yoki uchinchi shaxs huquqlarini buzuvchi kontent joylashtirish.
- 5.Ijrochi ushbu qoidalar buzilganda hisobni ogohlantirib yoki jiddiy hollarda ogohlantirmasdan to'xtatib qo'yishga haqli.
7. Nomzodlar ma'lumotlari va maxfiylik
- 1.Nomzodlarning shaxsiy ma'lumotlariga nisbatan Buyurtmachi ma'lumotlar egasi hisoblanadi; Ijrochi ularni faqat Buyurtmachi topshirig'i asosida qayta ishlaydi.
- 2.Buyurtmachi nomzodlardan ularning ma'lumotlarini qayta ishlashga qonun talab qiladigan roziligini olishni o'z zimmasiga oladi.
- 3.Har bir tashkilotning ma'lumotlari alohida ajratilgan holda saqlanadi; boshqa tashkilot ularga kira olmaydi.
- 4.Ijrochi Buyurtmachi ma'lumotlarini uchinchi shaxslarga sotmaydi va reklama maqsadida uzatmaydi. Istisno — xizmat ko'rsatish uchun zarur bo'lgan infratuzilma provayderlari va qonuniy asosda vakolatli organlar so'rovi.
- 5.Hisob o'chirilganda ma'lumotlar 30 (o'ttiz) kun ichida o'chiriladi, qonunda saqlash majburiyati bo'lgan hollar bundan mustasno.
- 6.Sun'iy intellekt nomzodni baholashda faqat yordamchi vosita: yakuniy qarorni har doim Buyurtmachi qabul qiladi.
8. Javobgarlik
- 1.Platforma «bor holicha» (as is) taqdim etiladi. Ijrochi Platformadan foydalanish Buyurtmachining aniq biznes natijalariga olib kelishini kafolatlamaydi.
- 2.Ijrochining javobgarligi har qanday holatda so'nggi 3 (uch) oy ichida Buyurtmachi to'lagan obuna summasidan oshmaydi.
- 3.Ijrochi boy berilgan foyda, bilvosita zararlar hamda uchinchi shaxslar (internet-provayder, to'lov tizimi, bulut provayderi) ishidagi uzilishlar uchun javob bermaydi.
- 4.Taraflar fors-major holatlari (tabiiy ofat, favqulodda holat, davlat organlari qarori, magistral aloqa uzilishi) yuzaga kelganda majburiyat bajarilmaganligi uchun javobgar bo'lmaydi.
9. Shartnomaning amal qilishi va bekor qilinishi
- 1.Shartnoma aksept paytidan boshlab kuchga kiradi va taraflar majburiyatlari to'liq bajarilgunga qadar amal qiladi.
- 2.Buyurtmachi istalgan paytda hisobini o'chirish orqali shartnomani bekor qilishi mumkin.
- 3.Ijrochi ushbu oferta shartlarini buzgan Buyurtmachi bilan shartnomani bir tomonlama bekor qilishga haqli.
- 4.Ijrochi oferta shartlarini o'zgartirishi mumkin. Yangi tahrir Platformada e'lon qilingan paytdan kuchga kiradi; o'zgarishdan keyin Platformadan foydalanishni davom ettirish yangi tahrirga rozilik hisoblanadi.
10. Nizolarni hal qilish
- 1.Nizolar muzokara yo'li bilan hal qilinadi. Da'vo javobi muddati — uni olgan kundan 15 (o'n besh) kun.
- 2.Kelishuvga erishilmasa, nizo O'zbekiston Respublikasi qonunchiligiga muvofiq Ijrochining joylashgan yeri bo'yicha sudda ko'riladi.
- 3.Ushbu shartnomaga O'zbekiston Respublikasi qonunchiligi qo'llaniladi.
Ijrochining rekvizitlari
- Tashkilot
- «DEVLINE» MCHJ
- STIR
- 312677883
- Manzil
- Toshkent shahri, Chilonzor tumani, Qatortol MFY, 9-mavze, 1-b uy
- Telefon
- +998 90 819 97 51
- info@topkan.uz
- Sayt
- https://topkan.uz